Konstitusiyamıza əsasən hər kəsin sosial təminat hüququ vardır. Bu baxımdan insanların sosial-demoqrafik vəziyyətinə görə gəlir əldə etmə imkanları məhdud olan ayrı-ayrı kateqoriya şəxslərə sosial yardım göstərilməsi dövlət tərəfindən yardım məqsədi ilə sosial müavinətlər verilir. Bu müavinət növlərindən biri də birdəfəlik sosial müavinətlərdir.

Radiasiya qəzası nəticəsində zərər çəkmiş şəxslərə hər il müalicə üçün, uşağın anadan olmasına görə, dəfn üçün, cəza çəkməkdən azad edilmiş tibbi və sosial yardıma ehtiyacı olan şəxslərə, Azərbaycan Respublikasının işğaldan azad edilmiş ərazilərində işləyən mütəxəssislərə onların ilkin maddi-məişət şəraitinin dəstəklənməsi üçün, habelə valideynlərini itirmiş və valideyn himayəsindən məhrum olmuş uşaqlara ilk dəfə işə düzələn zaman dövlət tərəfindən sosial yardım məqsədilə birdəfəlik müavinətlər verilir.

Birdəfəlik müavinətlər maliyyələşmə mənbələrinə görə dövlət büdcəsi və məcburi dövlət sosial sığorta hesabına ödənilən müavinətlərə bölünür.