Uşaq doğulduqda valideynlərdən birinə ödənilən birdəfəlik müavinət “Uşağın anadan olmasına görə birdəfəlik” müavinət adlanır.  
Uşaq doğumuna görə birdəfəlik müavinət uşağın doğulmasının vətəndaşlıq vəziyyəti aktlarının dövlət qeydiyyatını aparan orqanlarında müəyyən edilmiş qaydada qeydiyyatdan keçirilməsindən sonra verilir. Bu zaman müavinət uşağın doğulmasından sonra nə qədər yaşamasından asılı olmayaraq verilir.

1 yanvar 2021-ci il tarixdən sonra doğulan uşaqlara görə məcburi dövlət sosial sığorta haqları hesabına (işləyən şəxslərə) «Uşağın anadan olmasına görə birdəfəlik» müavinət proaktiv qaydada, yəni heç bir orqana müraciət etmədən təyin edilir. 1 yanvar 2021-ci il tarixdən əvvəl doğulmuş uşaqlar üzrə isə müavinətin alınması üçün iş yeri tərəfindən sənədlər rəsmiləşdirilərək Fondun yerli qurumuna elektron qaydada təqdim edilir. Uşağın anadan olmasına görə birdəfəlik müavinətin məbləği 1 yanvar 2023-cü il tarixindən 500 manat müəyyən edilmişdir.