Albaniyanın Tirana şəhərində “Pensiya sistemlərində xidmətlərin gücləndirilməsi: Yaşlı şəxslərin ehtiyaclarının qarşılanması” mövzusunda beynəlxalq konfrans keçirilib.
Beynəlxalq Sosial Təminat Assosiasiyasının (BSTA) və Albaniyanın Sosial Sığorta Qurumunun birgə təşkil etdiyi və Avropa regionu ölkələrinin sosial təminat qurumlarının təmsil olunduğu konfransda Dövlət Sosial Müdafiə Fondunun (DSMF) nümayəndələri də iştirak ediblər.
DSMF-nin Beynəlxalq əlaqələr departamentinin müdiri Elşad Xanəlibəyli konfransın “Müştəri xidmətləri, rəqəmsal və çoxkanallı xidmətlər” sessiyasına sədrlik edib. Konfransın “Pensiya xidmətlərində avtomatlaşdırmaya doğru” sessiyasında ölkəmizdə həyata keçirilən pensiya və sosial ödənişlər sahəsində rəqəmsal transformasiya, proaktiv təyinatla bağlı məlumat verilib.
Portuqaliya, Türkiyə, Slovakiya, Polşa, Çexiya, Sloveniya, Yunanıstan, İsveç, Birləşmiş Krallıq, Özbəkistan və digər ölkələrdən olan tədbir iştirakçıları Azərbaycan təcrübəsini böyük maraqla qarşılayıblar.







